21. Februar 2009

So, höt han ich mol mis Züg i die neui Wohnig züglet, damit ich am Mäntig in Rueh of Paris chan ond nöme bene komische Lüüt mues wohne. Fühl mich scho vell freier ond glöster, muen jetzt ned emmer Angst ha dass ich öbis falsches mache chönti wie z.B. d'Pfanne vo Hand abwäsche oder dass mini Wösch ide Wöschmaschine weniger wie 4 Kilo esch :-) Die super Lady be dere woni ebe bis jetzt gwohnt han, wot ebe ned dass mer s'Züg vo Hand abwäscht, well mer somit vell meh Wasser brucht als ide Abwäschmaschine, zodem lod sie d'Wäschmachine ned a, wenn ned 4 Kilo Wösch hesch, so döch mer au nor s'Wasser vergüde. Aber ich glaube ebe, dass d'Chleider au ned suber werded wenn mer so vell inestopft wie sie das macht. Blöds Huehn :-) (@Corinne: Madame Scorsipa läst grüssen).

18. Februar 2008

Halli Hallo liebi Blog-Läser
Es freut mi jedes mol wenn ich gsehne, dass er ned nor de Blog läsed, sondern au emmer weder cooli Kommentär mached!!! Han euch alli mega lieb ond es esch mega schön zwösse, dass mer ned eifach vergässe werd wenn mer weg esch. Han halt emmer weder chli Kriese (set amel au ned so vell Bligg lose:-) ged Heimweh).

Jo gester han ich min ersti AOC Kurs gha, das esch so en Alkohol Organisation vo de Schuel, wo mer 20 Euro zahlt damit mer Mitglied wird ond chan denn fast jedi Woche es Wi oder anders Alkohol Kürsli absolviere. Ja die Woche hani grad s'Glück gha, dass zwei Kürsli statt gfonde händ. Gester esch Cognac agseid gsi. Han emmer gmeint ich mögi vell verträge, aber de cheib de Siech brännt jo andersch, han amel d'Hölfti mösse usleere. Jo hauptsach ich han 5 Cognacs degustiert ond de tüürsti esch 130 Euro gsi. S'highlight esch denn de Drink am Schluss gsi (Cognac mit Giner Ale, jamjam).

Höt han ich denn grad witer gmacht med emene Champagner-Kürsli. Das esch scho besser gsi wie gester, trotzdem dass ich das Blubberzüg ned so gern han, aber sobalds halt echli besseri Qualität (Pol Roger) esch, werd da Züg no guet. Do esch de tüürsti au 150 Euro gsi, aber ich chan euch beruhige, er esch ned guet gsi, de besti esch 20 Euro gsi :-)

Jo jetzt ben ich scho zwei Täg nachenand chli Beschwipst heicho, esch scho schlimm do onde, mer chan am Alkohol usem wäg go ond mer lauft em trotzdem öber de Wäg....

15. Februar 2009

Es werd wiedemal Zit, dass en neue Itrag mache!!! Ich han die Woche en super Onderkunft gfunde wo ich am 21. izieh werde. Ich werde denn mit ere Französin läbe, wo sälber schaffed ond schätzigswis öbe 30gi esch. Esch en super liebi Frau ond s'Hüsli esch au super igrechtet med Garte ond emene Büsi. Freu mi scho riesig druf.

Zodem han ich dere letschde Woche mösse feststelle, dass ich die Franzose glaubs nie verstoh werde. Das esch so es komisches Volk. Be de einte Lehrerin seid mer am morge früeh am beste nüd, bis mer usegfunde hed, ob sie höt en guete oder schlächte Tag hed. Das ganze muen mer denn am Mittag nomol usefinde, da sich d'Stimmig sehr schnell ändere chan :-( Denn set mer dene Schnäggefrässer eri Gedanke chönne läse, well sie zom Teil Erwartige a dich stelled ohni ergend öbis z'säge. Wenns mers denn falsch gmacht hed, merkt mer das denn sehr schnell, da mer en riese Zämeschiss isacke muen.

Jo zodem han ich höt mis scholang ersehnte Velo kauft. Esch en super 'Renngeiss' wie das de Marci amel so schön seid. Esch garantiert es gstohlnigs Velo wod am Märt för 30 Euro chaufe chasch. Ben jo gspannt wie lang ich das Velo ha wird, bis es mir au gstohle wird :-)

Ui, höt hani die ersti Austere i mim Läbe gässe. Esch no echt lecker wenn mer of Gschlüder mit Salzwassergschmack ond Zitrone stod. Jo ond denn gets do nomol so öbis komisches. Die cheibe Franzose kenned ke Wöschchochi. Das heisst dass mer eifach ergendwo wo mer Platz hed, en Wöcheständer ufstellt ond det eifach alles ufhänke muen. Zodem esch die Wöschmaschine wo ich amigs bruche muen so was vo SCHEISSE, dass ich nachem wäsche no muen Wöschwieb spille ond alles nomol uswinde muess. Tja, hoffes d'Wöschmaschine ide neue Wohnig esch besser....

Fotos: 1. Partytram in Club, 2. So gönd d'Brite in Usgang, 3. + 4. Französischi Wöschhänki

5. Mis Velo

6. Februar 2009

Die cheibe Franzose send jo scho fuuli Säck, die möched do am Fritig Mittag scho Weekend ond d'Lehrer lüted de Schuel a, dass chrank send (blau mached) obwohl d'Schüeler scho ide Schuel hocked ond of sie warted. Tja, denn hani halt a minere französische Arbet und Vortrag gschaffet, nimmt mi jo schono wonder öb das en gueti Note ged ;-)

4. Februar 2009

Es esch Mittwoch ond das bedüted do 'Partytime'. Am Obe semmer zersch zom Victor hei go vortrinke ond of die 12i in Club 'les 4 sens', det esch denn d'Post abgange med stinkbillige Getränk. Die Getränk send zwar scho billig, aber ich han s'Gfühl ich han no nie so vell Geld brucht wie ich do bruche!!!! Nach emene usgiebige Tanzobe (@homber: hed en hufe Espanolos do wo chönd tanze) esches denn am 4i med em Car is Stadtzentrum zrug. Do in Bordeaux send ebe alli Clubs am Arsch vo de Wält.

02. Februar 2009

De ersti Schueltag hed gradmol 4h dured, also en Zuckerschlecke, zodem hets no gratis Crèps geh ond Nutellabüchsli, Chips... Alles i allem chan mer säge, dass die Schuel en riese Partypalast esch!!! Ide Pausen lauft emmer Partysound, meistens 4 bis 6h Schuel ond öbe 1 Mol ide Woche frei. Ben mol gspannt öb das emmer so witergod. Zodem wird all Mittwoch en Party vo de Schuel us organisiert wo meistens imene Club stattfindet ond de Itrett esch öbe 3 euro.

So jetzt muen ich glaub mol no öbis vo minere Unterkunft verzelle. Ich han agno gha, dass ich inere WG wohne werde, jedoch esch das ned de Fall. Ich läbe med emene Ehepaar wo öbe 50gi esch imene chline Hüsli med Gärtli... Sie send eigentlich nett, jedoch darf mer i dem Hus sozäge nüd mache. Ke Kollege mithei neh, de Frönd dörf ned öbernachte, mer sett ned all zu spot oder früeh hei cho... Darom han ich höt gseid, dass ich uszieh werde ond mer was neues sueche muen.

31. Januar 2009

Das esch mer en Tag gsi, zersch heds agfange med ere domme Bemerkig vo mim Host-Mami, dass ich so spot heicho ben ond denn esches witer gange med ichäuf.... Hauptsach am Obe heds weder en Party geh....

Zersch esches zo de Marie hei go eis trinke oder zwei oder drü...Witer esches denn ine Schwulebar (mis erste Mol) da de einti Kolleg schwul esch ond d'Marie lesbisch. Det hämmer es cheibe Gaudi gha med schöne ond weniger schöne Manne...ond emene Bildschirm wo halbi Schwulepornos gloffe send... Nachdem denn de Marci d'Schnorre voll gha hed vo de Amachige send mer zwei denn witer ine Bar. Det hämmer honger öbercho, anstatt eus öbis aständigs of de Tisch z'stelle hämmer igleiti Chillis becho, die send räzbüsi weg gsi, wie au en Fläscheöffner, Korkezieher ond es Shotgläsli wo of einisch i minere Täsche glandet send.

Nachdem mer us de Bar grüert worde send, hämmer ofem Heiwäg no en Döner welle esse. Da mich de Dönerma ned hed welle is Lokal ie lo ond ich ombedingt ofs WC han mösse, han ich mer es lauschigs Plätzli welle sueche zom mini Blase chli erliechtere. Sowit esches denn garned cho, da ich vomene Balkon us agsproche worde ben vo Französische Studente (händ grad en Homeparty gha). Die send denn so lieb gsi ond händ mich be ene ofs WC glo. Nachher schnell, schnell weder zrog an Dönerstand go de Döner ässe. Nachdem ich weder gstärcht gsi ben, han ich mich weder ufgmacht zo de Franzose ad Homeparty wos denn am 6 am Morge Zit gsi esch zom heigo ond pfuse.

Fotos: 1. TV ide Schwulebar, 2. Marcel, ich, Sonja, 3. Bryan + Pierre, 4. Marie Gauvin

30. Januar 2009

Endlich, mer händ d'Esther (Schwizerin wo in Winti id Schuel god ond do scho 6 Mönet esch) kenneglernt. Bemene feine Ässe hämmer sie med Froge glöcheret. Nochane esches witergange ane Homeparty.... Wenn öber ned weiss was en Homeparty esch, denn muen er sich en Wohnig vorstelle wo för 2 Lüt gmacht esch ond öbe 30 Studente det inne sind med en hufe Alkohol (womer selber mitbringt). Am 3 hämmer denn aunöme möge ond send heigange.

Fotos: 1. Euse bsoffnig Gitarrest, 2. kei Komentar, 3. les trois Suisses (Esther, Marci, ich)

29. Januar 2009

S'Ziel vo dem Tag esch gsi, dass ich de Marcel am "Place de la Victoire" finde ohni Natel ond Charte. Ich han gli mol mösse feststelle, dass das no rächt schwierig esch öber z'finde ohni Charte ond ohni Natel. Of jede Fall hed de Marci 45 of mich gwartet ond ich han de Platz emmer no ned gfonde gha :-( Nachdem ichs denn au ufgeh han, hani es Tourismusbüro gfonde wo ich denn mini heissgeliebti Stadtcharte becho han.

Am Obe hed denn scho die ersti Party vo de Schuel stattgfonde. Poolparty hed sich das gnennt. D'Badhose ond Bikini hämmer debi gha, Tüechli au, de Pool hämmer au vorgfonde aber do fehlt doch no öbis. Jo natürlich, en Bar. Mer händ eusne Auge ned chönne traue wo mer i die Badi ie gloffe send ond ke Bar gfonde händ. Ja nach emene chorze Jacuzzi ufenthalt semmer denn no einisch d'Rutschbahn dorab ond nach nor 15 Min. Ufenthalt weder hei.

Abreise nach Bordeaux 28. Januar 2009

Am Morge am 8 iesche losgange, ich ben natürlich nervös gsi ond han ghofft, dass ich nüd vergässe ond han alles 2 Mol kontrolliert öbis au wörklich debi han. Nachere tränerieche Verabschiedig vo mim Schmuse ben ich denn vo Bade nach Zürich greist. Det han ich mis Gspändli, de Marcel, wo au mit of Bordeaux chond go studiere troffe. Ich natürlich total nervös ond de Marci, ech has fast ned chönne glaube, emmerno storzbetrunke ofem Perron 13. Denn eschs denn los gange med de Fahrt vo Zürich nach Genf Aeroport. Ich han mich ufgregt dass de Marcel urgrechnet damol hed mösse sis Natel dihei vergesse ond er hed med de Übelkeit kämpft.

Am Aeroport acho, semmer dor de Schwizerzoll zom of de Französische Grenze ichecke, denn esch mer no in Sinn cho, dass ich jo no of d'Post muen, wo of de Schwizersite gsi esch. Toll, nomol dor de Zoll dore of d'Schwizersite. S'domme esch nor gsi, dass de cheibe Zöllner no of Französisch froged woher ich chömi. Mer esch natürlich nüd anders igfalle als "rien" säge ond froge ob er au Dütsch chan. Tja, nachdem mer au am Zoll verbi cho send ond alles erlediget händ, esches de nach Bordeaux gange.

In Bordeaux acho send scho die erste Problem uftauch. De Marci ond ich send det ghocket wie bstellt ond ned abgholt. Mer natürlich ned gwösst was mache da ich jo kei Telefonnommere gha han vo minere Host-Mami ond er d'Nommere gha hetti aber sie natürlich ofem Natel ide Schwiz gha het :-( Tja, nach 20 Minute ben ich denn usgruefe worde ond han mis Host-Mami gfonde. Die Frau hed denn grad no de Marci zo sinere WG brocht.