19. - 22. Mai 2009

Am Zistig Morge händ mer z4te es Auto gmietet zom es chlises tüürli zmache bis am Fritig. Zersch semmer of Toulouse, det hämmer en brasilianische Kolleg vo eusem Kolleg troffe ond dete au i sinere mini Wohnig z'5te pennt. Am Mittwoch esches denn witer nach Biarritz wo mer denn imene super Hotel (för 20 euro) pennt händ. Am Donnsti esches denn witer nach St. Jean de luz, San Sebastian (Spanie), Bayonne go Tapas esse. Nach 3 asträngende Täg med Strand, Party ond langer Autofahrt send mer denn am Fritig morge of die 2 heicho.

Foto 1 + 2: Biarritz. Foto 3 + 4: Toulouse

15. - 18. Mai 2009

A dem Wochenend esch de Luki wedermol in Bordeaux gsi damol med sine Eltere. Leider esch s'Wetter ned grad de hammer gsi, aber mer händs trotzdem gnosse.

Foto: Am Luki sini Vorspies im Burerestaurant

14. Mai 2009

Leeeeeeny Kravitz!!!!!!!!!!! Am Ruman sim Geburi ben ich am Konzert vom Lenny Kravitz gsi!!! Esch hammer gsi, ich ben no nie amene Konzert gsi wo de Sänger so dankbar gsi esch, dass d'Fans as Konzert chömed ond er hed sogar Föteli vom Publikum gmacht zom i sis Touralbum ine chläbe :-)

06. - 09. Mai 2009

Motto: Asträngendi Alkohol Woche

Am Mittwoch 6. Mai send mer zonere Kollegin go brötle ond natürlich hed de Alkohol auned dörfe fehle. Ruckzuck esch en 0.7 dl Fläsche Desperados ond en halbi Fläsche Wi ide Nicole erem Buch verschwonde. Natürlich hani denn am Donnstigmorge weder id Schuel mösse - esch cheibe asträngend gsi. Jo am Donnstigobe esch denn CHEZ POMPON agseid gsi. Es Glas Wi för 3 euro, dementsprechend esch de Wi aunor so gflosse. Am 11 send mer denn zo dem super chici, mici Restaurant/Bar usegrüert worde. Da ich emmerno durst gha han ond demensprechend öberhaupt ned erfreut gsi ben, os de Bar grüert zwerde, send of einisch 3 leeri Wigläser för eusi schlächt equipti Chochi i mim Handdäschli glandet. E bizli meh wie beschwipst ben ich denn dehei acho. Det esch natürlich au d'Party voll abgange, well mini Mitbewohnerin en Homeparty gmacht hed. Jo denn esches dete witergange med em Wi trinke. Bis mer denn ine anderi Bar send. Am morge am halbi 5i esches denn weder rechtig hei gange med de auto (bezwiefle dass eusi fahrer no total nüechtern gsi send). Tja, die einti hed of jede fall gfonde sie mössi nüd znacht esse, dementsprechend hed sie avo chörble sobald s'auto agfange hed fahre. wo mer denn endlich mol be ere dihei acho send, esch sie denn aunöme asprechbar gsi, so dass de chrankewage hed mösse cho. Ich öbe am halbi 6i deheime ond han am 7ni weder mösse ufsto, well mer of san sebastian (Spanie) med de schuel gange send. ich han natürlich s'gfühl gha ich chöngi jetzt ohni problem 1h go schlofe ond denn ufstoh. Denkste, am 8i wäri de bus ide schuel abgfahre ond ich ben emmerno herrlich am pfüsele gsi :-( nach öbe 10 telefonarüef ond alli 10 minute en wecker, ben ich denn total erschrocke verwachet ond han mich gfroged wiso mer d'esther zmitz ide nacht alüted. sie hed mer denn versuecht bizbringe, dass de bus jetzt denn abfahri ond ich so schnell wie möglich id schuel cho selli. ich han no total betrunke mis züg zämegsuecht ond med em velo id schuel gfahre. anstell vo normal 25 minute, han ich of einisch norno 15 minute med em velo gha. Da sich de bus no verfahre hed, han ich denn au mit of san sebastian chönne.

S' motto in san sebastian esch gsi, 24 stunden san sebastian, d.h. ohni schlofe. Natürlich esch das för mich ned möglich gsi, da ich de ganz tag am omesüche gsi ben ond am 9i zobe schoweder total betrunke gsi ben. ben ich denn am 12i is hostel vo de ire go penne währenddem die im club gsi send bis am morge am 4i. tja, er chönd euch jo vorstelle wies mer denn am samstig ergange esch...

Foto 1: San Sebastian wärend em esse. Foto 2: ide bar mit minere Mitbewohnerin. Foto 3: Homeparty

29. April - 3. Mai 2009

Madrid olé!!!!! Nachdem ich scho en Woche Ferie med minere Family verbrocht han, han ich denn ide Woche druf nor Mäntig ond Zistig Schuel gha ond han natürlich die Chance grad packt zom d'Martina in Madrid z'bsueche. Gäll Homber!!!!!

Am Zistigobe esches los gange med em Car, 9h Carfahrt, ça fait chier! Einigermasse usgschlofe hed mich denn d'Martina am Busbahnhofe am Morge am 7ni med emene big hug empfange. Mer send denn vite, vite go min Koffer hei tue ond zMorge ässe ond denn esches scho los gange go d'Stadt entdecke. Die Stadt esch eifach de Hammer!!! Wenn er d'Glägeheit händ, denn müend er ombedingt mol es paar Täg of Madrid! Chorz zämegfasst esches wie Paris aber med emene spanische Temprament, ohni Eifelturm, Tapas ond Sangria. Ich han denn au scho am erste Obe eri dütsche ond holländische Kollege kenneglernt - die Dütsche send sogar am Schwizerdütsch lerne med de Martina :-)

Am Donnstig semmer denn of Segovia. Da mer ned gwüsst händ wie lang mer of Segovi ha werded hämmer eini am Bahnhofschalter gfroged ond die seid una hora. Ok, da mer erst am 12i am Bahnhof gsi send, hämmer gfonde, dass das tiptop passt. Naja, im Zug händ mer denn nach una hora mösse feststelle, dass mer no ned in Segovia send. Finally send mer nach dos horas denn mol ändlich acho. Denn hämmer chli die schöne Monument aglueged bis mer denn of de Turm vom Chateau welle händ, genau denn hets avo rägele. Tja, Räge macht schön... Vorem Turm hed eus denn so es alts Chopfduechfraueli en Knirps-Schirm welle verchaufe för 3 Euro. Mer händ denn gfonde, das esch z'tüür ond es hört jo eh grad weder uf Regne. D'Martina hed denn no welle märte, dass mer 2 Schirm för 5 euro öberchömted aber das Fraueli hed ned welle nachegeh - verständlicherwis. Mer send denn ongefähr 15 Minute witergloffe ond es hed weder avo rägne - merde, hette mer doch die cheibe Schirm kauft. Denn semmer halt öbis go ässe, dass er es Dach öberem Chopf händ. Spöter send mer denn no dor d'Shopping Stross dor ond händ öberleid, ob er jetzt en Schirm chaufe selled - Schirm 10 euro. Das immer weder liecht avo Rägne hed ond weder ufghört hed, hämmer eus entschlosse, kei Schirm zchaufe. Tja, mer händs denn bereut wos so rechtig avo schiffe hed. Resultat: Kein Schirm ond pflotschnassi Stink-Füess, da eusi Balerinas doregloh händ.

De Usgang am Donnstig obe esch au nicht ohne gsi - am Morge am 8i fang im Bett gsi. Am Fritig hämmer denn wie verzwiflet Balerinas gsuecht, aber do jo alli Läde am 1. Mai zue gha händ, hämmer eus med Flip-Flops mösse zfriede geh :-)

Jo, am Sonntigobe han ich denn weder hei mösse (träneriche Abschied), damit ich am Mäntig direkt id Schuel han chönne go. Hihi, wo ich med em Car am 6i am Morge heicho ben, beni glaubs no so müed gsi, dass ich s'falsche Tram gnoh han :-)

April 2009

Merde!!!! Jetzt han ich vor luter im Zügs omehüenere min Blog vergesse..... (Merci Brige). Dementsprechend duen ich chli de April zämefasse.

Im April han ich min ersti Kurs of Französisch agfange - Finance en Français - c'est la merde. Ich han die ganz Bilanz mösse in Französisch lerne ond mer muess debi säge, dass das ned so eifach esch wie d'Bilanz of Englisch lerne. Well die blöde Franzose immer no anderi Zahle zwösche EBITDA ond EBIT ifüeged. Tja, ich han das Modul i dene 3 Woche au öberstande ond d'Prüefig au nor chönne usfülle, well ich eim abgschriebe han. Sogar d'Franzose händ müeh gha die Prüefig z'löse!!!!

Jo, den am 5. April ben ich s'erstmol i mim Läbe ine Opere es Ballet (Romeo + Julia) go luege, esch gut gsi, aber mössti das ned all Weekend mache.

Am 17. April esch denn mini Family med Luki nach Bordeaux cho (en voiture). Muess säge, dass es en super schöni Woche gsi esch, aber au astängend ond z'churz. Wättertechnisch esch die Woche au de hammer gsi, aber da muen ich euch jo ned verzelle, well er jo denn au hammer Wätter gha händ. I dere Woche semmer an Màrt, go shoppe, Bordeaux gnosse, is Medoc go es Chateau aluegeo nd natürlich Wi degustiere, St. Emilion esch au ofem Programm gstande, Arcachon ond Dune de Pilat.....

Hmmm, d'Föteli chömed spöter, da ichs nonig emol gschafft han d'Föteli vo de Kamera of de PC z'lade :-(

16. - 21. März 2009

Am Mäntig 16. März esches ab nach Dublin gange, wo mer z'11te am Zistig de St. Patrickday gfiered händ. Mer send vo Bergerac us nach London gfloge ond vo London nach Dublin. Mer muess debi säge, dass de Flughafe Bergerac nor zwei Asylante-Container esch med ere Aflug/Landebahn. Die einzig Fluggsellschaft wo dete Landet esch d'Ryanair. Da eus de Bryan, Irländer, gseid hed, dass de Alkohol in Irland 3 mol so tüür esch als in Bordeaux, send mer of die Idee cho, Alkohol nach Dublin zneh. Da ich au die einzigi Person gsi ben, wo es Gepäck bueched hed, han ich 10 Liter Vodka i minere Koffere gha zom ichecke. Damit ich die 15 Kilo Gepäck ihalte han chönne, hämmer alle Vodka in Plastikfläsche omgföllt, somit hed au ke Fläsche chönne kaputt go. Wo mer denn i dem Ufenthaltsruum ofs Boarde gwartet händ, esch of einisch en Durchsag gmacht worde. "The passenger Zimmermann has to go to the customs".....mhhhh, ben ich das? Med weiche Chnü ond hochrotem Chopf ben ich denn med de Esther zom Zoll. Det han ich denn mösse mini Koffere uftue, wo ich ufgeh gha han, da sie bem Scanne nor Flüssigkeite händ chönne entdecke. Wo denn de Koffer offe gsi esch, fragt mich eine vo dene 3 Zöllner was i dene Fläsch segi. Ich: "ich glaube das esch alles Vodka". Zöllner: "send sie sicher oder glaubed sie?". Ich:"jo ich ben sicher, es esch alles Vodka". Natürlich hed ere alli Fläsche ufto ond dra gschmöckt ond hed debi no sini Kollege gfroged obs en Schluck weled. Wärede em Schnuppere, hed mich de Zöllner druf ufmerksam gmacht, dass es verbote segi, Alkohol in Plastikfläsch abzfülle, mer mössi de immer i de Originalfläsche lo. Ok, de ben ich schoweder chli schläuer gsi. Ich han scho demit grächnet, dass ich alle Vodka chan in Bergerac lo ond no en saftigi Buess dörf zahle. Zo mim erstuhne seid denn de Zöllner: "Ok, sie händ jetzt mol Glöck gha, sie chönd de Alkohol so mitneh, da ich so en herzigi bin" :-) Beni wedermol med emene blaue Aug devo cho :-)

Am Zisit am Morge send mer denn de Umzug vom St. Patrick go luege, wo öbe 2h lang gange esch. Zobe semmer natürlich in Usgang gane, wo mer denn de Dave und de Zuber (Erasmus Studenten vode Schwiz) troffe händ. Am Mittwoch semmer is Guiness-Museum gange, wo s'schönste, interessantischte Museum esch wo ich je gseh han. Det hämmer glernt wie mer es Guiness zapft ond dass de Gschmack vomene Guiness sehr verschiede si chan, wenn mers ned med de rechtige Temperatur trinkt. Anschlüssend hämmer 2 Autos gmietet om nach Sligo z'fahre, wo de Bryan her chont. Am Donnstig hämmer denn Sligo ond d'Omgebig besichtiged ond am Fritig esches witer gange nach Galway, nachemene usgebige Sightseeing ond emene guete Znacht semmer am halbi 11i z'nacht zrug nach Dublin. Det hämmer denn 1h am Flughafe gschlofe well de Flüger scho of die 6i am morge nach London zrug esch. In London hämmer denn wie die letschde Penne of de Wartebänk pennt bis denn de Flüger am Mittag am 2 nach Bergerac zrug esch.

13./14. März 2009

Am Fritig 13. hed d'Alex (mini Mitbewohnerin) i erem chline Hüssli en Momeparty gmacht. D'Bilanz: 5 leeri Wiifläsche, 1 Fläsche Schnaps, 1 Fläsche Wisky ond das of 7 Lüüt verteilt.

Am Samstig ben ich denn med de Esther ane Wiusstellig med Degustation gange. 240 Wi, Armagnac, Muscat ond Cognac-Usteller händ sich i einere grosse Halle versammlet. Bilanz: zwei betrunkni Wiber med emene riese Hunger ond je zwei Fläsche Wi/Schnaps ide Händ ofem Heiwäg.

Fotos: 1. zwei bsoffni Wieber, 2. Homeparty, 3. Homeparty, 4. Alex (mini Mitbewohnerin)

6. März 2009

Am Fritig 6. März han ich wedermol frei gha ond han denn med es paar Lüt es Auto g'mietet zom oms Bassin d'Arcachon ome fahre ond anschlüssend uf d'Dune de Pilat zgo. D'Dune de Pilat esch die gröschti Düne in Europa. Esch mega idröcklich, of de einte Site nor Meer ond of de andere Wald.

Am Obe esches denn wedermol ine Club gange go fäschte. De Club sälber esch cool gsi aber d'Klos (wenn mer das es Klo nenne chan) send übelst gsi (Foti).

03. März 2009

Hui, jetzt händer aber lang nüd me vo mer ghört. Duet mer also mega leid, aber ich han mol einisch chli öbis för d'Schuel mösse mache ond ich ben au emmer chli onderwägs gsi.

Jo, am Zistig 3. März han ich wedermol es Wiikürsli gha wo schlossendlich usgartet esch im Wiisuffe anstatt degustiere. Nachem Wiikürsli ide Schuel hämmer gseh, dass es paar Delegierti en Apéro gha händ. Natürlich han ich mich med em Marcel det inegschmuggled ond gratis trunke ond gässe. Mer send nedmol die einzige Schüeler gsi, es händ sich nomol öbe 5 Lüt igschmuggled. Do de einti denn no de Choch kennt hed, hed de eus sogar no abote d'Reste medhei zneh.

Öbe am 9i esch denn fertig gsi med ässe ond es esch ab ane Openbar (1 euro zahle, so vell trinke wie mer chan). No more comments!!!!

Bilder: 1. Desserbuffet för die Delegierte, 2. Wiikürsli, 3. Wiikürsli

2. März 2009

Letschde Mäntig, 23.2.09, ben ich med em TGV nach Paris gfahre wo ich denn nachemene Monet mis Schätzli wedermol han dörfe gseh. Im gliche Wisch han ich no zwei Kolleginne troffe wo dete am studiere send. Am Zistig hämmer denn en lange Spaziergang de Seine entlang gmacht, d'Notre Dame aglueged ond en hufe Käffeli ond heissi Schoggi trunke zom eus chli ufzwärme.

Mittwoch esches denn scho einiges wärmer gsi ond mer händ eus denn of de Eiffelturm gmacht, natürlich medem Lift. Super Ussicht!!!!!! Nachemene lange Spaziergang de Champs Elise entlang ond en hufe Schnappschüss spöter send mer zode Melanie go z'nachtesse. Natürlich dörf en Nachtusflug bemene Parisbsuech ned fehle, darom han ich ond de Luki denn no en Parisrundgang bi Nacht gmacht. Dommerwis han ich denn be de Melanie dehei am Marcel sis Portemonaie ipackt, well ich dänkt han es seg am Luki sis. Tja, denn hämmer halt no en chline Omwäg gmacht, damit de Marci sis Portemonaie för de Usgang gha hed :-)

Am Donnstig send mer denn no go d'Sace Coeur go aluege, das esch en Chile, wo chli oberhalb vo Paris esch, vo det us hed mer en super Ussicht of Paris. Nachemene lange Tag, med emene Burgerzmittag händ mer eus denn so rechtig of es Chinesisches Znacht gfreut. Mer send dementsprechend 2.5 h früehner rechtig Bahnhof gfahre, damit mer det z'Nachtesse hetted chönne, Betonig of chönne!!!! Wo mer am 5i id Metro gstiege send, send mer grad mol 1.5 Statione wit cho, wos plötzlich en Liechtblitz geh hed ond en Vollbrämsig druf gfolgt esch. Stromusfall, esch eusi ersti Anahm gsi. Es paar Sekunde spöter d'Durchsag vom Zugfüehere, mer selled eu gedulde, es göchi i öbe 2 Minute witer. Nach dene 2 Minute esch en Durchsag cho, dass es en schwäre Personeonfall geh heigi, mer mössed eus gedulde. Nach 5 Minute gedulde heds denn gheisse mer mössed Fahrzüg för Fahrzüg usstiege. Ok, usstiege?! Wie ond wo? Mer send do zmitzt imene Metrotunnel!!!!! Nachdem ich denn en Französin gfroged han, was das jetzt genau bedütet, han ich ere no ned so ganz glaubt, was sie mer do gseid hed. Erst woni denn d'Lüt gseh han us de Metro usespringe ond näbe de Metro ofem Gleis entlanglaufe hanis denn glaubt. Jetzt händ mer doch tatsächlich mösse med zwei Koffere of de Gleis (ca. 1 Meter breit) entlanglaufe, bis die nächsti Metrostation cho esch. Be eus wörd mer denn Ersatzbüs organisiere, aber doch ned in Paris, det muen noche jede selber luege wie er an Bahnhof chond, egal öb die ganzi Hauptverkehrsachse an Bahnhof lahm lid. Nach langem Studiere ond Metrofahrplan aluege, händ mer denn en ander Wäg gfonde ond euses Chinesisch-Znacht as Bei gstrieche, deför hets Quick-Burger Menu geh, wie scho zom Zmittag :-(

Naja, deför hämmer noche am Fritig en super schöne Tag (17 Grad) am Strand verbrocht ond am Samstig Bordeaux med em Rummelplatz gnosse bem gliche T-Shirt-Wätter.

Fotos: 1. Bordeaux Quinquance, 2. Arcachon Bassin, 3. Eifelturm bi Nacht, 4. Mis Schätzli vorem Tour d'Eiffel

21. Februar 2009

So, höt han ich mol mis Züg i die neui Wohnig züglet, damit ich am Mäntig in Rueh of Paris chan ond nöme bene komische Lüüt mues wohne. Fühl mich scho vell freier ond glöster, muen jetzt ned emmer Angst ha dass ich öbis falsches mache chönti wie z.B. d'Pfanne vo Hand abwäsche oder dass mini Wösch ide Wöschmaschine weniger wie 4 Kilo esch :-) Die super Lady be dere woni ebe bis jetzt gwohnt han, wot ebe ned dass mer s'Züg vo Hand abwäscht, well mer somit vell meh Wasser brucht als ide Abwäschmaschine, zodem lod sie d'Wäschmachine ned a, wenn ned 4 Kilo Wösch hesch, so döch mer au nor s'Wasser vergüde. Aber ich glaube ebe, dass d'Chleider au ned suber werded wenn mer so vell inestopft wie sie das macht. Blöds Huehn :-) (@Corinne: Madame Scorsipa läst grüssen).

18. Februar 2008

Halli Hallo liebi Blog-Läser
Es freut mi jedes mol wenn ich gsehne, dass er ned nor de Blog läsed, sondern au emmer weder cooli Kommentär mached!!! Han euch alli mega lieb ond es esch mega schön zwösse, dass mer ned eifach vergässe werd wenn mer weg esch. Han halt emmer weder chli Kriese (set amel au ned so vell Bligg lose:-) ged Heimweh).

Jo gester han ich min ersti AOC Kurs gha, das esch so en Alkohol Organisation vo de Schuel, wo mer 20 Euro zahlt damit mer Mitglied wird ond chan denn fast jedi Woche es Wi oder anders Alkohol Kürsli absolviere. Ja die Woche hani grad s'Glück gha, dass zwei Kürsli statt gfonde händ. Gester esch Cognac agseid gsi. Han emmer gmeint ich mögi vell verträge, aber de cheib de Siech brännt jo andersch, han amel d'Hölfti mösse usleere. Jo hauptsach ich han 5 Cognacs degustiert ond de tüürsti esch 130 Euro gsi. S'highlight esch denn de Drink am Schluss gsi (Cognac mit Giner Ale, jamjam).

Höt han ich denn grad witer gmacht med emene Champagner-Kürsli. Das esch scho besser gsi wie gester, trotzdem dass ich das Blubberzüg ned so gern han, aber sobalds halt echli besseri Qualität (Pol Roger) esch, werd da Züg no guet. Do esch de tüürsti au 150 Euro gsi, aber ich chan euch beruhige, er esch ned guet gsi, de besti esch 20 Euro gsi :-)

Jo jetzt ben ich scho zwei Täg nachenand chli Beschwipst heicho, esch scho schlimm do onde, mer chan am Alkohol usem wäg go ond mer lauft em trotzdem öber de Wäg....

15. Februar 2009

Es werd wiedemal Zit, dass en neue Itrag mache!!! Ich han die Woche en super Onderkunft gfunde wo ich am 21. izieh werde. Ich werde denn mit ere Französin läbe, wo sälber schaffed ond schätzigswis öbe 30gi esch. Esch en super liebi Frau ond s'Hüsli esch au super igrechtet med Garte ond emene Büsi. Freu mi scho riesig druf.

Zodem han ich dere letschde Woche mösse feststelle, dass ich die Franzose glaubs nie verstoh werde. Das esch so es komisches Volk. Be de einte Lehrerin seid mer am morge früeh am beste nüd, bis mer usegfunde hed, ob sie höt en guete oder schlächte Tag hed. Das ganze muen mer denn am Mittag nomol usefinde, da sich d'Stimmig sehr schnell ändere chan :-( Denn set mer dene Schnäggefrässer eri Gedanke chönne läse, well sie zom Teil Erwartige a dich stelled ohni ergend öbis z'säge. Wenns mers denn falsch gmacht hed, merkt mer das denn sehr schnell, da mer en riese Zämeschiss isacke muen.

Jo zodem han ich höt mis scholang ersehnte Velo kauft. Esch en super 'Renngeiss' wie das de Marci amel so schön seid. Esch garantiert es gstohlnigs Velo wod am Märt för 30 Euro chaufe chasch. Ben jo gspannt wie lang ich das Velo ha wird, bis es mir au gstohle wird :-)

Ui, höt hani die ersti Austere i mim Läbe gässe. Esch no echt lecker wenn mer of Gschlüder mit Salzwassergschmack ond Zitrone stod. Jo ond denn gets do nomol so öbis komisches. Die cheibe Franzose kenned ke Wöschchochi. Das heisst dass mer eifach ergendwo wo mer Platz hed, en Wöcheständer ufstellt ond det eifach alles ufhänke muen. Zodem esch die Wöschmaschine wo ich amigs bruche muen so was vo SCHEISSE, dass ich nachem wäsche no muen Wöschwieb spille ond alles nomol uswinde muess. Tja, hoffes d'Wöschmaschine ide neue Wohnig esch besser....

Fotos: 1. Partytram in Club, 2. So gönd d'Brite in Usgang, 3. + 4. Französischi Wöschhänki

5. Mis Velo

6. Februar 2009

Die cheibe Franzose send jo scho fuuli Säck, die möched do am Fritig Mittag scho Weekend ond d'Lehrer lüted de Schuel a, dass chrank send (blau mached) obwohl d'Schüeler scho ide Schuel hocked ond of sie warted. Tja, denn hani halt a minere französische Arbet und Vortrag gschaffet, nimmt mi jo schono wonder öb das en gueti Note ged ;-)

4. Februar 2009

Es esch Mittwoch ond das bedüted do 'Partytime'. Am Obe semmer zersch zom Victor hei go vortrinke ond of die 12i in Club 'les 4 sens', det esch denn d'Post abgange med stinkbillige Getränk. Die Getränk send zwar scho billig, aber ich han s'Gfühl ich han no nie so vell Geld brucht wie ich do bruche!!!! Nach emene usgiebige Tanzobe (@homber: hed en hufe Espanolos do wo chönd tanze) esches denn am 4i med em Car is Stadtzentrum zrug. Do in Bordeaux send ebe alli Clubs am Arsch vo de Wält.

02. Februar 2009

De ersti Schueltag hed gradmol 4h dured, also en Zuckerschlecke, zodem hets no gratis Crèps geh ond Nutellabüchsli, Chips... Alles i allem chan mer säge, dass die Schuel en riese Partypalast esch!!! Ide Pausen lauft emmer Partysound, meistens 4 bis 6h Schuel ond öbe 1 Mol ide Woche frei. Ben mol gspannt öb das emmer so witergod. Zodem wird all Mittwoch en Party vo de Schuel us organisiert wo meistens imene Club stattfindet ond de Itrett esch öbe 3 euro.

So jetzt muen ich glaub mol no öbis vo minere Unterkunft verzelle. Ich han agno gha, dass ich inere WG wohne werde, jedoch esch das ned de Fall. Ich läbe med emene Ehepaar wo öbe 50gi esch imene chline Hüsli med Gärtli... Sie send eigentlich nett, jedoch darf mer i dem Hus sozäge nüd mache. Ke Kollege mithei neh, de Frönd dörf ned öbernachte, mer sett ned all zu spot oder früeh hei cho... Darom han ich höt gseid, dass ich uszieh werde ond mer was neues sueche muen.

31. Januar 2009

Das esch mer en Tag gsi, zersch heds agfange med ere domme Bemerkig vo mim Host-Mami, dass ich so spot heicho ben ond denn esches witer gange med ichäuf.... Hauptsach am Obe heds weder en Party geh....

Zersch esches zo de Marie hei go eis trinke oder zwei oder drü...Witer esches denn ine Schwulebar (mis erste Mol) da de einti Kolleg schwul esch ond d'Marie lesbisch. Det hämmer es cheibe Gaudi gha med schöne ond weniger schöne Manne...ond emene Bildschirm wo halbi Schwulepornos gloffe send... Nachdem denn de Marci d'Schnorre voll gha hed vo de Amachige send mer zwei denn witer ine Bar. Det hämmer honger öbercho, anstatt eus öbis aständigs of de Tisch z'stelle hämmer igleiti Chillis becho, die send räzbüsi weg gsi, wie au en Fläscheöffner, Korkezieher ond es Shotgläsli wo of einisch i minere Täsche glandet send.

Nachdem mer us de Bar grüert worde send, hämmer ofem Heiwäg no en Döner welle esse. Da mich de Dönerma ned hed welle is Lokal ie lo ond ich ombedingt ofs WC han mösse, han ich mer es lauschigs Plätzli welle sueche zom mini Blase chli erliechtere. Sowit esches denn garned cho, da ich vomene Balkon us agsproche worde ben vo Französische Studente (händ grad en Homeparty gha). Die send denn so lieb gsi ond händ mich be ene ofs WC glo. Nachher schnell, schnell weder zrog an Dönerstand go de Döner ässe. Nachdem ich weder gstärcht gsi ben, han ich mich weder ufgmacht zo de Franzose ad Homeparty wos denn am 6 am Morge Zit gsi esch zom heigo ond pfuse.

Fotos: 1. TV ide Schwulebar, 2. Marcel, ich, Sonja, 3. Bryan + Pierre, 4. Marie Gauvin

30. Januar 2009

Endlich, mer händ d'Esther (Schwizerin wo in Winti id Schuel god ond do scho 6 Mönet esch) kenneglernt. Bemene feine Ässe hämmer sie med Froge glöcheret. Nochane esches witergange ane Homeparty.... Wenn öber ned weiss was en Homeparty esch, denn muen er sich en Wohnig vorstelle wo för 2 Lüt gmacht esch ond öbe 30 Studente det inne sind med en hufe Alkohol (womer selber mitbringt). Am 3 hämmer denn aunöme möge ond send heigange.

Fotos: 1. Euse bsoffnig Gitarrest, 2. kei Komentar, 3. les trois Suisses (Esther, Marci, ich)